පැරණි විලාසිතාවක් තුළ සැඟවූ නවීන ගේමින් මවුසයක හැකියාවන්
ඩෙක්ස්ටොප් පරිගණකයකට ආදාන උපාංගයක් ලෙසින් මවුසයක් තිබීම අත්‍යාවශ්‍ය වුවත්, තවදුරටත් ලැප්ටොප් උපාංගයන් මිලදී ගන්නා විට මවුසයක් මිලදී ගැනීම අනිවාර්ය නොවේ. කෙසේ වෙතත් ලැප්ටොප් උපාංග භාවිතා කරන්නන් බොහෝ දෙනෙකු පවා ඒ සමගින් වයර්ලස් හෝ USB මවුසයක් භාවිතා කිරීමට පෙළඹෙන්නේ, ලැප්ටොප් උපාංගයක ට්‍රැක්පෑඩයට වඩා එය වඩා කාර්‍යක්ෂම යැයි ඇතැමුන් සිතන නිසාවෙනි.
පරිගණකයට ඈඳන මවුස් උපාංගයන් සම්බන්ධයෙන් ගත් විට ශ්‍රී ලංකාව තුළ රුපියල් 300 ක් වැනි ඉතා අඩු මිලකට පවා මවුසයක් මිලදී ගැනීමට හැකියාව තිබෙනා අතර, වඩාත් දියුණු මවුස් උපාංගයන් රුපියල් 7000 ක් 8000 ක් වැනි මිලකට වුවද ගැනීමට තිබේ. සාමාන්‍යයෙන් භාවිතා කරන මවුසයකට වඩා පරිගණක ක්‍රීඩා කටයුතු සඳහා විශේෂිත වන ගේමින්ග් මවුසයක් ඉහළ මිල ගණන් යටතේ අලෙවි වන බවද සැලකිල්ලට ගත යුතු වේ. එසේම සාමාන්‍ය මවුසයකට වඩා විශේෂාංගයන්ගෙන් ඉහළ වීමද, ක්‍රියාකාරීත්වයෙන් වඩාත් ප්‍රශස්ත වීමද, නිමාවෙන් වඩාත් නවීන වීමද ගේමින්ග් මවුසයක දක්නට ලැබේ.
සාමාන්‍යයෙන් ලෝකයේ බොහෝ පරිගණක උපාංග නිෂ්පාදන සමාගම් මගින් පරිගණක ක්‍රීඩා ලෝලීන් වෙනුවෙන්ම වූ ගේමින්ග් මවුස් උපාංගයන් නිෂ්පාදනය කළත්, මිනිස් අතට උපරිම පහසුව සැපයීම, ඉහළ කාර්යක්ෂමතාවය හා නිරවද්‍යතාවය සහ දැරිය හැකි මිල යන සියලුම සාධකයන් පරිපූර්ණව සමබර කොටගෙන ගේමින්ග් මවුස් උපාංගයන් එළිදැක්වීම අසීරු කරුණකි. කෙසේ වෙතත් පරිගණක උපාංග නිෂ්පාදනයේ ප්‍රමුඛයෙකු වන Logitech සමාගම මගින් හඳුන්වා දෙන Logitech G MX518 ගේමින්ග් මවුස් උපාංගය එම කරුණ සාක්ෂාත් කොට ගෙන තිබේ යැයි බැලූ බැල්මට පෙනී යයි.
මෙම Logitech G MX518 මවුස් උපාංගය දෙස බැලූ විට සිහිපත් වන්නේ, Logitech සමාගම මගින් දශකයකට හෝ දෙකකට පෙර හඳුන්වා දී තිබූ ක්ලැසික් මවුස් නිර්මාණයකි. කෙසේ වෙතත් ඔවුන් සහතික කරන්නේ, මෙම පැරණි පන්නයේ මවුස් උපාංග නිර්මාණ සැලසුම තුළ උපරිම පහසුවත්, නවීන තාක්ෂණයත් අන්තර්ගත කොට ඇති බවයි.
මෙම මවුස් උපාංගය එහි පැරණි මුතුන් මිත්තාගේ පෙනුම ඒ ආකාරයෙන්ම අනුහුරු කරගෙන තිබුණත්, මෙම නව මවුස් උපාංගය නිර්මාණය කර ඇති අමුද්‍රව්‍ය වඩාත් දියුණු වී ඇතැයි පැවසේ. එනිසා මෙහි දිගුකල් පැවැත්ම සම්බන්ධයෙන් වැඩි සහතිකයක් පරිශීලකයින්ට ලැබෙනු ඇත.
මෙම Logitech G MX518 මවුසය තුළ, Logitech සමාගමේ ෆ්ලැග්ෂිප් ගේමින්ග් මවුසයන් තුළ අන්තර්ගත වන 16,000 DPI සංවේදීතාවයෙන් යුතු HERO 16K සෙන්සරය අන්තර්ගත කිරීමට Logitech සමාගම කටයුතු කොට ඇත. ඒ ඔස්සේ එයට තත්පරයකට රාමු 17,000 ක අනුපාතයක් ග්‍රහණය කර ගැනීමට හැකියාව ලැබෙනු ඇත. මෙය ඉහළ නිරවද්‍යතාවයක් ඉල්ලා සිටිනා නවීන පරිගණක ක්‍රීඩා හැසිරවීම සඳහා අනිවාර්ය වේ. මීට අමතරව මෙම මවුසය තුළ 32-bit ARM ප්‍රොසෙසරයක්ද තිබෙනා අතර, ඒ හරහා USB සම්බන්ධතාව ඔස්සේ මිලිතප්පර 1 ක අධි වේගී ප්‍රතිචාර ශීඝ්‍රතාවක් සහතික කර සිටී.
මෙම Logitech G MX518 මවුසයේ පෙර සැකසුම් කර ඇති DPI සැකසුම් පහක් තිබේ. එම DPI සැකසුම් පහ 400, 800, 1600, 3200 සහ 6400 ලෙසින් වන අතර, එම සැකසුම් අතර අවශ්‍ය විටදී මාරු වීමේ හැකියාව ලබාදීමට, පාලක බොත්තම් දෙකක්ද මවුසයේ බඳේ ඇත. එසේම අවශ්‍ය නම් ඔබට Logitech Gaming මෘදුකාංගය හෝ Logitech G HUB ඔස්සේ මෙම පෙර සැකසුම් DPI අගයයන් ඔබට අභිමත පරිද්දෙන් වෙනස් කර ගැනීමටද හැකියාව ඇත. එසේම මෙහි ඇති පාලක බොත්තම් අටම ඔබට අවශ්‍ය ක්‍රියාකාරකම් සඳහා පෙර සැකසුම් කළ හැකි අතර, ඒ ඔස්සේ ඔබට පරිගණක ක්‍රීඩාවක නිරත වන විට යතුරු පුවරුව හා කටයුතු කිරීමට සිදුවන ප්‍රමාණය අවම වනු ඇත. එසේම පාලක බොත්තම් පහක් සඳහා ඔබ කරනා පෙර සැකසුම් මවුසය තුළම අන්තර්ගත වන අතර, ඔබට Logitech G MX518 මවුසය වෙනත් පරිගණකයකට සම්බන්ධ කළ විටදීද එම පාලක බොත්තම් පහ සඳහා ඔබ සැකසුම් කළ කාර්යයන් එලෙසින්ම තිබෙනු ඇත.
මෙය රැහැන් රහිත තාක්ෂණයන්ගේ ආධිපත්‍යය තිබෙනා යුගයක් බව අපට පිළිගැනීමට සිදුවේ. එසේ වුවත් මෙම Logitech G MX518 මවුසය රැහැන් සහිත උපාංගයක් ලෙසින් හඳුන්වා දී ඇති අතර, සම්බන්ධිත පරිගණකයෙන් ප්‍රමාණවත් දුරක සිට මෙහෙයුම් කටයුතු සිදුකිරීමට පරිශීලකයාට අවකාශය ලබාදීම සඳහා අඩි 7ක USB කේබලයක්ද මෙයට අන්තර්ගත කොට ඇත.
අප මුලින් කියූ ලෙසට පරිපූර්ණ සමබරතාවකින් හෙබි ගේමින්ග් මවුසයක් ලෙසින් Logitech G MX518 උපාංගය ඉදිරිපත් කිරීමට Logitech සමාගම සමර්ථව ඇතිද? අනිවාර්යයෙන්ම මෙහි ඉහළ කාර්‍යක්ෂමතාව සහ උපරිම නිරවද්‍යතාව සම්බන්ධයෙන් විවේචනයක් නොමැත. එසේම මෙම මවුස් උපාංගයට මුල් වූ ක්ලැසික් මවුස් සැලසුම සේම මෙයද දීර්ඝ වෙලාවක් වුවත් පරිගණක ක්‍රීඩා සඳහා භාවිතා කළ හැකි අයුරින්, මිනිස් අතට උපරිම සුවපහසුවක් ලබා දෙමින් නිමවා ඇති බවද පිළිගැනීමට සිදුවේ. අවසාන වශයෙන් මෙහි මිල ඇමරිකානු ඩොලර් 59.99ක් ලෙසින් දක්වා ඇති අතර, එය සාමන්‍යයෙන් නවීන ගේමින්ග් මවුසයක් අලෙවි වන මිලම වේ. එනිසා මෙය බජට් මවුස් උපාංගයක් යැයි සැලකීමට හැකියාවක් නැත. එසේ වුවත් මෙහි ක්‍රියාකාරීත්වය, සමාගම චිර ප්‍රසිද්ධ වී ඇති ලෙසට දීර්ඝකාලීන පැවැත්ම සහ නවීනත්වය සලකා බලන විට එම මිල සම්බන්ධයෙන් විරුද්ධ වීමටද හැකියාවක් නැත.
Chat with Us